Laiebühni-Glögglifels i dr hüttigä Form bestoht sit am 5.Februar 1998. Domols het sich d'Theatergruppe vom
Männerchor Eintracht trennt, um e eigenä Verein uff d'Bei z'stellä.
Mit 9 Mitglieder isch d'Laiebühni Glögglifels im Restaurant Chez Georges in Grälligä gründet wordä, unterem
Vorsitz vom Georges Thüring.

Aber scho lang vorhär si am Männerchor-Obe regelmässig Theater uffgfüehrt wordä. Allerdings het domols
d'Theatergruppe no unterem Männerchor Eintracht gspielt.
Was do alles für Theater zu beste gä worde si, gsehn dr in euserem Archiv.

Gegäwärdig si im Verein 54 Mitglieder, Darsteller und Helfer. Mir füehrä alle 2 Johr im März und jedes Johr
im Novämber ä Mundart-Theaterstück uff. Derbi konzertrierä mir eus uf d'Spartä Unterhaltig. Näbem Agebot vo
dä Schwizer Theaterverläg hei mir au scho ä Stück us Hagen/Deutschland vom Hansjörg Wagner
>Alles blos kei Buur<, uufgfüehrt. Us em allemannische is Schwizerdütsch übersetzt het's d'Claudia Kübli.

Au süscht si mir e recht aktive Dorfverein und unternähmä au in dr theaterlose Saison einiges mitenand.
Wenn's Dir g'fallt, vielicht au e mol imene Theater mit z'machä, oder wenn Du süscht in irgenderä Art und Wies
mit eus in Kontakt blibe möchtisch, denn gib d'r ä Ruck, schnuf tief durä und versuch's doch eifach emol! Schick
eus ä eMail oder lüt doch eifach d'r Christa Raithofer oder süscht öpperem wo dir vertraut isch, a.
Mir suche nämlich no Lüt wo hinter der Bühni chöneä mithälfä.
Du chasch au nur bi de Probä emol inäluegä, do gsehsch am bestä öbs dir bi eus chönnt g'fallä.
Sitem 3.Juni 2003 si mir uf dr neu renoviertä Bühni, i dr Mehrzwäckhalle in Grälligä, jewils am Mittwuch
ab de viertelvorachti zobä am probä.